Kemi një lajm të mirë për adhuruesit e kësaj salce të mrekullueshme!
Salcat franceze janë të njohura për përsosmërinë e tyre dhe shijen jashtëzakonisht të mirë. Por edhe përgatitja e tyre është goxha sfiduese.
Në fakt gjatë përgatitjes së salcës së famshme hollandaise, shumica e kuzhinierëve “djersijnë”, pasiqë është pak e vështirë “kapja” e momentit të duhur për të përzier të verdhat e vezës me gjalpën e nxehtë.
Në të vërtetë, nëse gjalpën e tejnxehur e bëni bashkë me vezët, gjasat janë që do të përfundoni me vezë të ziera dhe një përzierje të shëmtuar, në vend të salcës së butë, të verdhë e kremoze.
Prandaj u propozojmë që në vend të mënyrës së zakonshme, tani e tutje, këtë salcë ta përgatisni-në blender!
Në fakt, nëse të verdhat e vezës i përzieni me pak lëng limoni ose uthulle dhe i miksoni në blender në temperaturën më të ulët, gjalpën e nxehtë mund ta shtoni në masë pa fijen e frikës së krijimit të kokrrizave ose zierjes së vezës.
Sepse shpejtësia me të cilën mikson blender është shumë më e madhe nga shpejtësia që do të mund të krijonim gjatë përzierjes me dorë.
Prandaj, tani e tutje përgatiteni këtë salcë pikërisht me blender dhe shoqërojini me të ushqimet tuaja të preferuara si peshkun, shpargujt ose mishin./ Gastro
(Visited 1,287 times, 1 visits today)
