Përbërësit për katër persona:
– 400 gr spaghetti
– 700 g fruta deti miks ( midhje, molusqe, karkaleca deti, kallamarë të vegjël)
– 6-7 lugë gjelle vaj ulliri
– 2 domate
– 3 thelpinj hudhre
– 1 spec të djegës
– pak kripë
– pak piper
– pak majdanoz të grirë
– 100 ml verë të bardhë
Në një tigan hedhim vaj ulliri, thelpinjtë e hudhrës dhe specin e djegës. I vendosim në zjarr dhe kur shohim që hudhra fillon të skuqet, shtojmë molusqet. Pas disa minutash në zjarr ata do të hapen komplet (nxjerrim jashtë tiganit molusqet e pahapura).
Hedhim verën e bardhë në to. Sapo të ketë avulluar alkooli, shtojmë midhjet e pastruara. Pasi janë hapur midhjet, shtojmë domaten e grirë hollë. I hedhim pak kripë e pak piper dhe i trazojmë.
Ndërkohë vendosim një tenxhere me ujë e kripë në zjarr dhe kur të marrë valë uji hedhim makaronat të ziejnë. Kur të shohim që salca në tigan po trashet, shtojmë kallamarët dhe karkalecat. Mbulojmë me kapak dhe e lemë të ziejë me zjarr të ngadaltë derisa makaronat të ziejnë.
Kullojmë makaronat dhe i bashkojmë me salcën e përgatitur. I përziejmë mirë dhe sipër i hedhim majdanoz të grirë.
Mbushim pjatat me makarona dhe i servirim të ngrohta me pak piper sipër, sipas dëshirës.
