TIRANË, 23 korrik/ATSH/ Ministri i Turizmit dhe Mjedisit, Blendi Klosi mblodhi Taskforcën e Turizmit dhe Komitetin e Menaxhimit të sezonit turistik.
Ministri Klosi bëri të ditur se gjatë takimit u diskutua mbi ecurinë e deritanishme të sezonit turistik, zbatimin e rregullave të protokollit shëndetësor dhe sigurimin e shërbimit shëndetësor në zonat turistike.
Po ashtu, në fokus, sipas Klosit, ishte edhe sigurimi i qetësisë publike nga ana e forcave të rendit nëpërmjet kontrolleve të tyre të vazhdueshme në plazhe dhe përgjigjeve në kohë në raste emergjencash.
Klosi siguroi se qeveria po ndërmerr të gjitha masat për mbarëvajtjen e sezonit veror.
Ministria e Turizmit dhe Mjedisit në bashkëpunim me Ministrinë e Shëndetësisë dhe Mbrojtjes Sociale kanë hartuar protokollin e masave antikovid për sezonin turistik 2021, i detyrueshëm që të zbatohet nga sipërmarrjet e shërbimeve turistike.
Në strukturat akomoduese duhet të ruhet distancimi fizik deri në 2 metër, në plazhe duhet të kryhet dezifektimi i krevateve të plazhit, shërbimeve higjienike dhe aksesorëve të ndryshëm çdo ditë në mënyrë periodike. Hapësira nga çadra në çadër nuk duhet të jetë më e vogël se 3.5 m.
Në bare dhe restorante tavolinat duhet të kenë një distancë më shumë se 1 metër larg. Gjatë këtij sezoni, pishinat do të jenë të hapura, por duke respektuar rekomandimet e protokollit, si dezinfektimi i përditshëm, ndërsa shezlonget e tyre me distancë të paktën 2 metra larg nga njëri grup tek tjetri.
Çdo sipërmarrje turistike rekomandohet të afishojë masat në vende dukshme.
Numri i shtetasve të huaj që vizituan Shqipërinë gjatë gjashtëmujorit të parë të 2021, është 1.687.919, duke shënuar rritje me 2,2 herë, në krahasim me të njëjtën periudhë të vitit 2020, duke iu afruar kështu ritmeve të para krizës së COVID-19.
/r.e/
