Aplikimet për viza në BE do të përpunohen nga një platformë e vetme

Aplikimet për viza në BE do të përpunohen nga një platformë e vetme evropiane, sipas një drafti të zbuluar nga Komisioni Evropian të mërkurën.

Me qëllim të dixhitalizimit të plotë të procesit të vizave deri në vitin 2025, organi ekzekutiv i BE-së propozoi krijimin e një platforme të vetme të BE-së për të aplikuar për viza në zonën Shengen dhe për të paguar tarifat online.

Faqja do të përcaktojë gjithashtu se cili nga 26 vendet e Shengenit do të jetë përgjegjës për përpunimin e aplikimit dhe do të sigurojë informacion mbi procedurën.

Komisioni Evropian pret që masat të reduktojnë burokracinë dhe të ulin koston e aplikimeve për viza, duke përmirësuar gjithashtu sigurinë e zonës Shengen.

“Është koha që BE-ja të sigurojë një platformë të shpejtë, të sigurt dhe të bazuar në internet për aplikimin e vizave të BE-së për qytetarët e 102 vendeve të treta që kërkojnë viza afatshkurtra për të udhëtuar në BE”, tha Ylva Johansson, komisionerja e bllokut për punët e brendshme.

Sondazhet tregojnë se më shumë se gjysma e aplikantëve për viza e shohin procesin “të rëndë” dhe rreth një e treta duhet të udhëtojnë një distancë të gjatë për të aplikuar për vizë në konsullatën e vendit të BE-së në të cilin ata planifikojnë të udhëtojnë, shpjegoi ajo.

“Një proces modern i vizave është thelbësor për ta bërë më të lehtë udhëtimin në BE për turizmin dhe biznesin,” shtoi Johansson.

Nëse propozimi miratohet nga Parlamenti Evropian dhe vendet anëtare të BE-së, platforma online mund të funksionojë që në vitin 2026.

Vendeve anëtare të BE-së do t’u jepet një periudhë tranzicioni pesë-vjeçare deri në vitin 2031 për t’u përshtatur me sistemin e vetëm të vizave të BE-së.

Burimi: AA